Vlaamse liederendatabank

Een kindekijn is ons gheboren

Uit: "Dit is een suyverlijck boecxken", Antwerpen, 1508

Een kindekijn is ons gheboren in Bethlehem:
des hadde Herodes toren, dat scheen aen hem.
Drie coninghen uut Orienten quamen uut Jerusalem.
Si vraechden waer is gheboren die coninc der Jodn:
wi saghnen in Orienten die sterre sijn.
Wi comen om te aenbeden dat kindekijn.

Een kindekijn is ons gheboren in Bethlehem:
des hadde Herodes toren, dat scheen aen hem.
Doe herodes dat vernam, datet kint gheboren was,
hi wert toornich ende gram ende hi ontsach hem das,
dat hi verliesen soude sijn rike groot.
Hi pensde hoe hi brenghen woude dat kint ter doot.

Een kindekijn is ons gheboren in Bethlehem:
des hadde Herodes toren, dat scheen aen hem.
Herodes vraechde die coninghen, waer dat kint gheboren was.
Si seiden: te Bethlehem binnen. Als ons die propheet las:
dat daer comen soude een heer also groot,
die al die werelt verlossen soude met sinen doot.